Түркістан облысында «Адал ата-ана — қауіпсіз балалық шақ» өңірлік тұжырымдамасы аясында балалардың қауіпсіздігі мен жарқын болашағына бағытталған кешенді жұмыстар жүргізілуде.
Тұжырымдаманың басты бағыты – әр баланың өмірі мен денсаулығын қорғап, қауіпсіз орта қалыптастыру. Осы мақсатта жұмыс үш негізгі бағыт бойынша жүзеге асады:
Дене саулығы және қауіпсіздік
Балаларды судағы қауіптен, тұрмыстық жазатайым жағдайлардан және жол-көлік оқиғаларынан қорғау – басты міндеттердің бірі. Каналдар мен өзен-көлдердегі қауіпсіздік, терезеден құлау, өрт пен газдан сақтану, жол қозғалысы ережелерін сақтау бойынша түсіндіру жұмыстары күшейтіледі.
Эмоционалдық және рухани қауіпсіздік
Бала үшін ең қауіпсіз орта – түсіністік пен сенімге құрылған отбасы. Осы бағытта ата-ана мен бала арасындағы қарым-қатынасты нығайту, суицид пен зорлық-зомбылықтың алдын алу, жасөспірімдерге дұрыс тәрбие мен психологиялық қолдау көрсетуге басымдық беріледі.
Әлеуметтік және құқықтық жауапкершілік
Жасөспірімдердің түнгі уақыттағы жүріс-тұрысын бақылау, вейп, есірткі және құмар ойындардың зияны туралы ақпараттандыру – қоғам алдындағы маңызды міндет. Баланың қауіпсіздігіне тек мектеп емес, ата-ана мен қоғам да бірге жауапты.
Бала қауіпсіздігі – бір күндік науқан емес, әр отбасының күнделікті назарындағы маңызды мәселе. Өйткені әр баланың амандығы – ел болашағының кепілі.
